உரிமைப்போராட்டம் – 4 – சி.சிவன்சுதன்

??????????? ??????

மருத்துவர் கோபப்படுவார் என்று கருதி நோயுற்றவர்களோ அல்லது அவர்களின் உறவினர்களோ தமது உண்மையான விருப்பங்களை மறைத்து தவறான கருத்துக்களை வெளியிடுவது எதிர்மறையான விளைவுகளை ஏற்படுத்தக்கூடும்.
பல சந்தர்ப்பங்களில் நோயுற்றவர்கள் தமது உண்மையான விருப்பு வெறுப்புக்களை மருத்துவக்குழுவிற்கு மறைத்து பொய்யான தகவல்களை சொல்ல வேண்டிய நிலை காணப்படுகின்றது. காரணம் சில தகவல்களையும் விருப்பங்களையும் சொன்னால் அது மருத்துவக்குழுவினுடனான உறவு நிலையை பாதிக்கும் என்ற அபிப்பிராயம் ஆகும். மருத்துவக் குழுவின் கடமையானது ஆலோசனையும் அனுசரனையும் வழங்கி சிகிச்சை அளிப்பதாக இருக்கிறதே அன்றி யாரையும் கண்டித்து தண்டித்து திருத்தமுயல்வது அதன் நோக்கமாக இருக்கமுடியாது.
சரியான ஆலோசனைகளை நோயுற்றவர் கடைப்பிடிக்காதுவிட்டால் அவருக்கு ஏதாவது ஆபத்து நிகழ்ந்து விடுமோ என்ற மனிதாபிமான அடிப்படையிலே நோயுற்றவர்களை கண்டிக்கும் நிகழ்வு பல நடைபெற்றவண்ணம்தான் இருக்கின்றன. கண்ணுக்கு முன்னால் ஒருவர் ஆபத்தை நோக்கிச் சென்றுகொண்டிருக்கும்பொழுது அவரை தடுத்தும் கேட்காமல் அதே திசையில் அவர் சென்றுகொண்டிருக்கும்பொழுது அதனை அமைதியாக பார்த்துக்கொண்டிருப்பது யாருக்கும் மிகவும் கடினமானதாக இருக்கும். இந்த நிலையே பல சமயங்களில் மருத்துவனுக்கும் ஏற்படுகிறது. எது எவ்வாறாக இருப்பினும் நோயுற்றவருடன் கோபப்படுவது சரியான செயலாகாது.
நோயுற்றவர்கள் நோய்காரணமாகவும், பல வசதிக்குறைவுகள் காரணமாகவும், உரிமைமீறல்கள் அல்லது அவர்களின் உரிமைகள் மதிக்கப்படாமை காரணமாகவும் அவமதிப்புக்கள் காரணமாகவும் ஆதரவின்மை, பாரமரிப்பு போதாமை போன்ற காரணங்களினாலும் பல்வேறுபட்ட இன்னல்களுக்கு ஆளாகிவருகிறார்கள். இந்த நிலையை மாற்றுவதற்கு வைத்தியசாலை மட்டங்களிலும், சமுதாய மட்டங்களிலும் பல பரந்துபட்ட நடவடிக்கைகள் தேவையாக இருக்கின்றது. இதன் மூலம் பல தவறான புரிந்துணர்வுகளையும் நிவர்த்தி செய்ய முடியும். நோயுற்றவர்களும் தமது உரிமைகளை வென்றெடுப்பதற்கு தம்மாலாக முயற்சிகளை எடுப்பதற்கு முயலவேண்டும்.
ஒருவர் தொழில்புரியும் இடத்தில் காணப்படும் அபாயநிலமை காரணமாக நோய்வாய்ப்பட்டால் அல்லது காயமுற்றால் அதற்கான நிவாரணத்தை தொழில் வழங்கனரிடமிருந்து பெற்றுக்கொள்ளும் உரிமை இருக்கின்றது. அத்துடன் நிரந்தர தொழில் புரியும் காலத்திலே ஒருவர் கடுமையாக நோய்வாய்ப்பட்டால் அவர் 3 மாதகாலம் வரை சம்பளத்துடனான லீவு பெறும் உரிமை இருக்கின்றது.
மருத்துவக்குழுவோ அல்லது ஊடகத்துறையினரோ நோயுற்ற ஒருவரின் நோய்சம்பந்தமான தகவல்களை அம்பலப்படுத்தினால் அதுசம்பந்தமாக சட்டநடவடிக்கை எடுக்கும் உரிமை நோயுற்றவருக்கு இருக்கின்றது. வைத்திய நிலையங்களில் தாம் அவமதிப்பட்டதாக உணர்ந்தாலோ அல்லது தமது பராமரிப்பு முறை திருப்திகரமாக இல்லை என்று உணர்ந்தாலோ அது சம்பந்தமாக வைத்தியசாலை நிர்வாகத்திடம் முறையிட்டு தகுந்த நடவடிக்கை எடுத்து அவ்வாறான சம்பவங்கள் மீண்டும் நடைபெறாமல் தடுப்பது நோயுற்றவர்களின் உரிமையும் கடமையுமாகும்.
மருத்துவ ஆலோசனைக்கு எதிராக ஒருவர் வீடு செல்லும் சந்தர்ப்பங்களில்கூட நோய்நிரூபண அட்டையையும் வீட்டிலே பாவிப்பதற்கான மருந்துகளையும் தொடர்ந்து வைத்தியசாலைக்கு வரவேண்டிய திகதிகளையும் கேட்டு பெற்றுக்கொள்ளும் உரிமை நோயுற்றவருக்கு இருக்கின்றது. மனம் மாறி அல்லது நோய் கடுமையாகி மீண்டும் அவர் வைத்தியசாலைக்கு வந்து அனுமதிபெற விருப்பப்படின் எந்தவித மனச்சஞ்சலமும் இன்றி வைத்தியசாலைக்கு வந்து அனுமதிபெறும் உரிமை அவருக்கு இருக்கின்றது.
தரக்குறைவான மருந்துகள் வழங்கப்படும் சந்தர்ப்பங்களும் ஏற்பட்டு வருகின்றன. இதனை தடுப்பதற்கான நடவடிக்கைகளை முன்னெடுக்கும் கடமையும் உரிமையும் ஒவ்வொருவருக்கும் இருக்கின்றது. வைத்திய நிலையங்களில் தமக்கான அடிப்படை வசதிகளை கேட்டு பெற்றுக்கொள்ளும் உரிமையும் நோயுற்றவருக்கு இருக்கின்றது.
தொடர்ந்து மருந்தெடுக்கவேண்டிய தேவை உடயவர்கள் வைத்தியசாலை கிளினிக்கில் OPD ஊடாக தாமாகவே சென்று சேர்ந்துகொள்ளும் உரிமை இருக்கிறது. இதற்கு வேறு வைத்தியர்களின் சிபார்சு கடிதங்களோ அனுமதிக் கடிதங்களோ அவசியமில்லை.
சில சமயங்களில் சட்டவரையறைக்கு உட்பட்டு நோயாளர்களின் உரிமைகளை மீறவேண்டிய இக்கட்டான நிலைகளும் மருத்துவக் குழுவிற்கு ஏற்படுகின்றது. உதாரணமாக நோயுற்ற ஒருவரின் மனநிலை சரியான தீர்மானம் எடுக்கக்கூடிய நிலையில் இல்லை என்று மருத்துவக் குழு கருதுமிடத்து அவரின் விருப்பத்திற்கு மாறாகவும் சில வைத்திய முறைகளை செய்ய வேண்டிய நிலை ஏற்படலாம்.
சிலவகையான தொற்றுநோய்கள் ஒருவருக்க ஏற்பட்டுவிட்டால் அந்நோய் பரம்பலை கட்டுப்படுத்துவதற்க்காக நோயுற்றவரின் அனுமதி பெறப்படாமலேயே சம்பந்தப்பட்ட சில அதிகாரிகளுக்கு இந்த தகவளை வழங்கவேண்டிய நிலை ஏற்படுகின்றது.
பொதுச்சேவையில் இருக்கும் ஒருவருக்கு ஏற்பட்டிருக்கும் நோயினால் மக்களுக்க பாதிப்பு ஏற்படும் என்று மருத்துவக்குழு கருதினால் அவ்வாறான தகவல்களையும் அவரின் விருப்பத்திற்கு மாறாக சம்பந்தப்பட்டவர்களுக்கு அறிவிக்கவேண்டிய நிலையும் ஏற்படலாம். உதாரணமாக பஸ்சாரதி ஒருவருக்கு கட்டுப்பாடில்லாத வலிப்பு நோய் இருக்குமாக இருந்தால் அவர் அந்தத் தொழிலுக்கு பொருத்தமான நபர் அல்ல என்று தீர்மானித்து அவரின் நோய் நிலை சம்பந்தமான தகவல்களை சம்பந்தப்பட்ட அதிகாரிகளுக்கு தெரிவித்து பொருத்தமான நடவடிக்கை எடுக்கவேண்டிய கடமை மருத்துவக்குழுவிற்கு இருக்கின்றது.
வைத்தியசாலைகளையும் பொது இடங்களையும் நோயுற்றவர் அசுத்தம் செய்யாமல் தடுப்பதற்காக அவர்கள்மீது சில கட்டுப்பாடுகளை சுகாதார நிர்வாகப் பிரிவினர் ஏற்படுத்துவது நோயுற்றவர்களுக்கு சில சிரமங்களை ஏற்படுத்தலாம். வைத்தியசாலை மற்றும் சுகாதார சட்டவிதிகள் நடைமுறைப்படுத்தும் பொழுது அதனால் நோயுற்றவர்களுக்கும் அவரது உறவினர்களுக்கும் ஏற்படும் வசதீயீனங்களை குறைப்பதற்கு நடவடிக்கைகள் எடுக்கப்படவேண்டும்.
நோயுற்றவர்களின் கவனிப்புமுறை உணர்வு சம்பந்தப்பட்டது. மனிதாபிமானம் சம்பந்தப்பட்டது. பல மனங்களின் உணர்ச்சி சம்பந்தப்பட்டது. மனச்சாட்சி சம்பந்தப்பட்டது. உயிருக்கும் உடலுக்கும் உணர்வுகளுக்கும் உறவுகளுக்கும் இடையேயான போராட்டமாகவே மருத்துச்சிகிச்சைமுறை அமைந்திருக்கிறது.
ஒவ்வொரு நோயுற்றவரும் குணப்பட்டுச் செல்லும் பொழுது அவரும் அவரது சுற்றமும் மட்டுமல்ல மருத்துவக் குழுவும் அவர்களுடன் சேர்ந்து மட்டற்ற மகிழ்ச்சி அடையும். ஒரு நோயாளிக்கு பாரதூரமான பாதிப்புகள் ஏற்பட்டுவிட்டால் அல்லது நோயுற்றவர் இறந்துவிட்டால் அவரது சுற்றத்துடன் சேர்ந்து மருத்துவக்குழுவின் உள்மனமும் துயரம்கொள்ளும். இவ்வாறான வேதனையான சம்பவங்கள் மருத்துவமனைகளில் தொடர்ந்தவண்ணம் இருக்கும். ஆனால் இதற்காக மருத்துவக்குழு தொடர்ந்து கவலைப்பட்டுக்கொண்டுடிருக்க சூழ்நிலை இடம் தரமாட்டாது. காரணம் இன்னும்பல நோயுற்றவர்களுக்கு சிகிச்சை அளிக்கவேண்டியதேவை இருந்துகொண்டிருக்கும்.
எத்தனையோ மரணங்களையும் துயரங்களையும் வேதனைகளையும் பார்த்து அனுபவித்து காரணத்தினால் நோயாளர்கள் தமது அறிவுரைகளைக் கடைப்பிடிக்காதபொழுது அவர்களுக்கும் அதேகதி நேர்ந்துவிடுமோ என்ற பதைபதைப்பு மருத்துவக்குழுவிற்கு இருக்கும். ஆனால் அதற்காக நோயுற்றவரை கண்டிப்பது நியாயம் ஆகாது. மனமும் உடலும் களைப்புற்றதால் சிலசமயம் கட்டுப்பாட்டை மீறி நோயுற்றவர்களை கண்டிக்க நேர்ந்தால் அதற்காக மருத்துவக்குழு மனம்வருந்தும்.
இவ்வாறான மனஉணர்வுகளை எல்லாம் எந்தச் சட்டக்கோவைக்குள் உள்வாங்குவது, யாரை நொந்துகொள்வது?, மருத்துவத்துறையில் ம்டுமல்ல எந்தத்துறையிலும் இருக்கும் குறைபாடுகளை நிவர்த்தி செய்வதற்கு சட்டக்கட்டுப்பாடுகளுக்கு மேலதிகமாக புரிந்துணர்வும் மனிதாபிமான உணர்வுகளும் கூட்டு முயற்சியுமே முக்கியமாக அமைகிறது.
சி. சிவன்சுதன்
வைத்திய நிபுணர்